O 12 de febreiro de 1809 nacía Charles Darwin en Shrewsbury, Inglaterra. Foi un neno curioso, moi interesado na natureza. Con dezaseis anos, comezou a estudar Medicina na Universidade de Edimburgo, pero acabou licenciándose en Cambridge, logo de recibir unha formación variada orientada á súa ordenación como sacerdote. Ao rematar os seus estudos, en 1831, embarcou no Beagle como naturalista. Durante cinco anos viaxou polas costas de Sudamérica e estudou a flora e a fauna dos lugares nos que o barco facía escala. Quedou impresionado pola diversidade de especies que observou. Quería saber cal era a orixe desa diversidade e a orixe das especies. Esta viaxe sería fundamental para o desenvolvemento das súas ideas evolucionistas.
Xa de volta en Inglaterra, casou, formou unha familia e dedicou os seguintes vinte anos da súa vida a ordenar as cuantiosas anotacións que recollera durante a súa viaxe no Beagle e a escribir a sua teoría da evolución por selección natural. O medo ao rexeitamento por parte da sociedade, profundamente fixista, da época levou a Darwin a retrasar a publicación do seu traballo.
Así que cando en 1858, Darwin recibe a carta dun naturalista novo chamado Alfred Russell Wallace, que chegara ás mesmas conclusións que el, de maneira independente e que lle enviaba un resume excelente das ideas fundamentais da evolución por selección natural, decátase de que ten que rematar o seu libro, "A Orixe das Especies" que se acabaría publicando en 1859.
O seguinte documental, en inglés, fala das dificultades persoais e profesionais que tivo que afrontar Darwin durante ese ano.
Ningún comentario:
Publicar un comentario